2018an, Orioko pobreziari buruzko azterketa egin zuen SIADECO Ikerketa Elkarteak, Udalak eskatuta. Herriko pobrezia, desberdintasunak eta gizarte-bazterketa aztertu zituzten.
Horretarako, gaiaren inguruan Europa osoan erabili ohi diren adierazleei buruzko informazio kuantitatiboa bildu zuten, inkesten bidez. Ondoren, metodologia kualitatiboak erabili zituen informazio hori osatzeko eta herriko informatzaile kualifikatuen azalpenak eta hausnarketak jasotzeko.
Egindako lana Pobrezia, desberdintasuna eta gizarte-bazterketa Orion izeneko txostenean jaso zuen SIADECOk eta Udaleko Gizarte Ongizate batzordeari aurkeztu zion.
Jendaurreko aurkezpena
Orain, azterketaren emaitzak jendaurrean aurkeztuko dituzte Udalak eta SIADECOk. Aurkezpen-ekitaldia azaroaren 12an izango da, 19:00etan, kultur etxeko areto nagusian. Aurkezpena irekia da gaiarekin interesa duten guztientzat.