Aurtengo literatur lehiaketa bertan behera utzi du Orioko Udalak

Udala harremanetan jarri da Orioko bi ikastetxeekin, aztertzeko ea zer aukera legokeen lehiaketa ikasturtea bukatu aurretik egin ahal izateko, baina adostasun nahikoa ez dagoela ikusita, aurtengoa bertan behera uztea erabaki du azkenean.

Orioko Udalak erabaki du aurtengo eskola-umeentzako literatur lehiaketa ez egitea, bizi dugun alerta sanitarioak sortzen dituen zailtasunengatik. Udalak urtearen hasieran egin zuen, urtero bezala, eskola-umeentzako literatur lehiaketaren deialdia, baina ikasleen lanak jasotzeko epea bukatu aurretik etorri zen klaseak etetea eta etxean konfinatu beharra.

Lehiaketa betiko moduan egitea ezinezkoa dela kontuan hartuta, Udala harremanetan jarri da Orioko bi ikastetxeekin, aztertzeko ea zer aukera legokeen, epeak luzatu eta aldaketa batzuk eginez, lehiaketa ikasturtea bukatu aurretik egin ahal izateko. Lehiaketarekin aurrera egiteko nahikoa adostasun ez dagoela ikusita, ordea, Udalak aurtengoa bertan behera uztea erabaki du azkenean.

Nolanahi ere, Udalak ez du baztertzen, egoerak horretarako aukera ematen duen neurrian, beste ekimenen bat abiatzea aurrerago, herriko haurrek egindako lanak argitaratzeko.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!