Bere ibilbideko aurreneko txapelketa ofiziala zuen atzo Udane Ostolaza harri jasotzaile gazteak, adinagatik orain arte ezin izan duelako lehia ofizialetan parte hartu. Horregatik, urduri zegoela azaldu dio gaur KARKARAri. "Gauean hasi nintzen urduri jartzen, lo egiteko ere gaizki", azaldu du. Harria jasotzen hastearekin bat lasaitu zen, ordea. "Besteetan baino ikusle gutxiagorekin jardun genuen, segurtasun neurriengatik edukiera murriztuta, baina gehienak ezagunak nituen, eta animatu ninduten, giro polita egon zen". Han izan zituen aiton-amonak ere, esaterako.
Helburua betetzeko aukera eduki zuen, gainera: 50 kiloko zilindrikoari 15 altxaldi eman zizkion, 50 kiloko kubikoari bederatzi, eta pisu bereko bolari, 12. "11 altxaldi egiteko asmoa neukan bolarekin, baina ondo sentitzen nintzenez, bat gehiago egitea pentsatu genuen".
Hilabete inguru aritu da entrenatzen guztira, tartean egokitu zirelako konfinamendu asteak eta egun horietan ezin izan duelako batere entrenatu. Fisikoki ondo sentitzen dela dio, eta hori, hein batean, "Zuhegani esker da, asko lagundu didatelako", esan du Ostolazak.
Finala, abuztuaren 1ean
Atzokoa izan zuen aurreneko lehiaketa ofiziala, eta oraindik beste bi saio egin beharko ditu finala baino lehen. "Hiru neska ari gara parte hartzen harri jasotze txapelketan, eta bakoitzak hiruna saio egingo ditugu, banaka, astero batek. Ondoren, hirurok jokatuko dugu finala, elkarrekin".
Karmele Gisasola eta Virginia Finol ditu lehiakide, esperientzia eta lorpen askoko kirolariak, biak. Horregatik, Ostolazak argi du berak bere lana eta bere helburuak dituela txapelketa honetan. "Oso zaila dut haiekin berdintzea, eta ni nire lana egitera joango naiz. Saiatuko naiz finalean ahalik lan txukunena egiten". Abuztuaren 1ean izango da egun handia, Azpeitian.