Erraz nagusitu dira Orioko neskak Bilboko estropadan

Oriotarrak, gaur, estropada irabazi eta bandera jaso ondoren

Donostiarrari hamabi segundo atera dizkio Oriok, eta ligako bosgarren garaipena eskuratu dute. Iosu Esnaola presidenteak jakinarazi du ez dutela parte hartuko Espainiako Txapelketan.

Hamar segundoko aldearekin atera dira Euskotren Ligako arraun taldeak gaur arratsaldean Bilbon: Hondarribia aurrena, Donostiarra bigarren, Orio hirugarren. Donostia Arraun, izan ere, ez da atera.

Marea behe-behean zegoela jokatu da estropada, eta haizeari eta korronteari kontra egitea tokatu zaie. Diferentzia handia egon da, horregatik, joanean eta etorrian. Itzulera azkarrago egin dute. Dena den, Orio nagusitasunez gailendu da, Donostiarrari 12 segundo aterata. Ziabogan ere, 7 segundoko aldea atera dio bere aurkari zuzenari. Gaurko estropadara arte, 22 puntu zituen Oriok eta 18 Donostiarrak. Hirugarrenak, Donostia Arraunek, 11 bakarrik. Gaur, aldea handitu egin du Oriok.

Hauek dira denborak: Oriok 10:44, Donostiarrak 10:57 eta Hondarribiak 11:07.

Zazpigarren jardunaldia jokatu dute gaur Bilbon, eta horietatik bost estropada irabazi dituzte. Bilbon garaipena lortu orduko entzun dira herrian itxaperoak.

Amaitu berritan, ETB1en egin dituzte adierazpenak Iosu Esnaola OAEko presidenteak eta Sandra Piñeiro arraunlariak. Pozik ziren biak. Iosu Esnaola: "Arratsalde borobila izanez hasi da, eta ea horrela segitzen duen. Pausoz pauso joan behar dugu erotu gabe, baina gaurko estropada oso garrantzitsua zen, eta nagusitasunez irabazi da gainera, beraz, gustura gara". Kazetariaren galderari erantzunez, Esnaolak jakinarazi du oriotarrak ez direla izango aurten Espainiako Txapelketan, harako txartela eskuratu zuten arren, koronabirusak eragindako egoera dela eta.

Piñeirok, berriz, esan du "estropada gogorra" izan dela: "Bero handia pasa dugu, erriora haizerik ez zelako sartzen, eta gogorra izan da. Aurreko astean ez genuen sentsazio onik eduki, eta beraz, gaurko garaipenagatik nahiko gustura gaude. Aurten maila bertsua dago batzuen eta besteen artean, eta batzuetan irabaziko dugu, baina besteetan...". Donostia Arraun taldekoak ere gogoratu ditu Piñeirok: "Liga hau laukoa da, ez hirukoa. Beraiek falta dira, eta azkar itzultzea espero dut, faltan botatzen ditugu".

 

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!