Orion, esaterako, hainbat merkatari, ostalari eta eragilek osatu dute Euskaraldia babesten eta sostengatzen duen hamalaukoa. Entitateek izena emateko epea irailaren 27an bukatuko da, eta urritik aurrera irekiko dute norbabakoak inskribatzeko aukera.
The Pass surf denda eta kafetegia da Euskaraldian parte hartuko duen establezimenduetako bat. Ane Otamendi arduradunaren testigantza da hau:
"Iruditzen zaigu oso garrantzitsua dela Orion euskara zaintzea, eta merkatariok urrats garrantzitsuak egin ditzakegu arlo horretan, euskara erabiltzea sustatzeko. Donostiara joaten direnean esaterako, denda batera sartu eta lehen hitza erdaraz egiten dute euskaldun askok, gaztelaniaz hitz egiteko ohitura handiagoa dagoelako hiriburuan. Komertzioetako arduradunek agurra euskaraz egiten badute berriz, herritarrek badakite euskaraz hitz egin dezaketela.
Horregatik, guk euskarari garrantzia eman diogu beti. Gure menuan nahiz sare sozialetan euskara izaten da erabiltzen dugun lehen hizkuntza, eta The Passera etortzen diren bezeroei ere euskaraz hitz egiten diegu. Uste dugu erabiltzaileek eskertzen dutela keinua. Gu donostiarrak gara, eta ohartu gara Orion gaudenetik euskara gehiago erabiltzeko ohitura hartu dugula. Orain nonbaitera joaten garenean euskaraz gehiago egiten dugu naturaltasunez."