Xaltxerak talde feministak Facebook-eko bere kontuan salatu du atzo gauean udaltzainek identifikatu egin zituztela pankarta bat jarri nahian ari zirenean, eta Gabon gau bezperan zubiko barandan jarritako beste bat falta zela hurrengo egunean. "2020an Euskal Herrian gizonezkoek eraildako emakumeen izenekin egindako pankarta zintzilikatu genuen Aterpe tabernatik ikusten zela, eta hurrengo goizean ez zegoen pankartarik. Atzo gauean, beste pankarta bat jartzen ari ginela udaltzainek identifikatu egin gintuzten... Zer pentsatu ematen digu herritar batzuei emakumeon errealitateak sortzen dien deserosotasun biolento honek", esan dute.
Taldeak argi esan du pentsatzen duena: "Feminismoa ez da ekintza kriminala. Kriminala, feminizidioak eta horrelako muturreko egoerak ahalbidetzen dituen egitura patriarkal guztia da".
Salatzen jarraituko dutela esan dute, eta 2020an Euskal Herrian izandako erailketa matxisten biktimen izenak gogoratu dituzte sarean: "Paola Mendez Uranga, aitak; Miren Uranga, bikotekideak; 74 urte emakume bat, semeak; 83 urteko emakume bat, bikotekideak".
Talde feministak udaltzainak aipatu arren, oraingoz udalak ez du adierazpen publikorik egin gaiaren inguruan.