Ingurumen larrialdia bistaratzeko ekintza ugari izan da gaur Euskal Herrian, U30 Aldaketaldia ekimenaren barruan. Larreko Mahaiak sustatuta eta tokiko eragileekin elkarlanean, klima, bioaniztasun eta ingurumen larrialdia salatu dute. Orion, erraustegiaren aurkako protesta egingo dute, eta herritar ugari batu da hondartza gaineko talaian. Irriparra Berreskuratu, Erraustegiaren Aurkako Mugimendua, Herrio Natur Taldeak eta Talai Mendik sustatu dute mobilizazioa.
“Globalean pentsatu eta lokalean ekin” leloak adierazi bezala, garraio, hondakin, bioaniztasun, lurralde antolaketa edota ibaien saneamendu politiketan krisi globala “hemen, gurean” hasten dela bistaratzea beharrezkoa da, Larreko Mahaiaren arabera. Ingurumen larrialdiari eraginkortasunez aurre egiteko, lokala eta globala uztartzeko ekimena izatea nahi dute antolatzaileek.
Irriparra Berreskuratuz eta Erraustegiaren Aurkako Mugimenduaz gain, honako eragileek egin dute bat Larreko Mahaiak sustatutako ekimenarekin: ELA, LAB, CCOO, ESK, STEILAS, EHNE, Ikasle Sindikatua, Greenpeace, Eguzki, GuraSOS, Ernai, Fridays For Future, Extinction Rebelion, Haritzalde, Satorralaia, Uliako Lore Baratzak, Aire Garbia, Ipar Haizea, Landarlan, Ekologistak Martxan, AHTrik EZ, Grupo Oarso Taldea, Urola Bizirik, Mutriku Natur Taldea, Antikapitalistak, BizilagunEKIN, Ondarroa 12 Mila, Naturkon, Zumaiako Natur Taldea, Arkamurka eta beste batzuk.