Orioko Udalak, urtero bezala, hobariak edo bonifikazioak onartu ditu familia ugarientzat, Ondasun Higiezinen Zergari dagozkionak, eta otsailaren 26ra arte irekita izango da epea hobari horiek eskatzeko. Hala, Orioko Udalak azaldu du familia ugarien agiria duten familiek etxebizitza batentzat eskatu dezaketela hobaria eta etxebizitza horrek familiaren ohiko bizitokia izan behar duela edo familiako kide batek bertan erroldatuta egon behar duela; gainera, familiako inork ez du izan behar beste ondasun higiezin baten jabe.
Hiru hobari mota zehaztu ditu Orioko Udalak, seme-alaba kopuruaren arabera: hiru seme-alaba dituzten familiei %52,50eko hobaria aplikatuko zaie, lau dituztenei %63ko hobaria, eta bost seme-alaba edo gehiago dituzten familiei: %73,50ekoa.
Eskaera egiteko udal bulegoetan edo orio.eus webgunean eskura daitekeen instantzia bete eta entregatu beharko dute familia ugariek, honako dokumentuekin batera: familia ugariaren txartela, Ondasun Higiezinaren gaineko Zergaren azken ordainagiria ordaindu izana akreditatzen duen agiria eta zinpeko aitorpena, adieraziz familiako inor ez dela beste ondasun higiezin baten jabe.