Orioko Bate Bizkorrak taldeko neskek abiatu dute Espainiako Ohorezko Sofbol Liga eta igandean 3. jardunaldia jokatu zuten etxean, Bartzelonatik etorritako Projecte Gava taldearen aurka. Eguraldia txarra izan arren, bi partidak jokatu zituzten Mendibeltz zelaian.
Lehenengo partidan oriotarrek gogor jokatu zuten, baina Projecte taldea izan zen garaile, 3-4 emaitza lortuta. Bigarren partida, ordea, desberdina izan zela aitortu dute OBBko kideek. "Hasieratik oso gogor jokatu genuen. Gure taldeko jaurtitzaile Igone Etxeberriak lan bikaina egin zuen eta aurkariei ez zien utzi lasterketarik egiten. Guk bi lasterketa bakarrik egin genituen, 3. sarreran; Sara Loidi eta Maialen Pison izan ziren baseetara iritsi zirenak", adierazi dute. Bakoitzak lasterketa bana egin zuen eta oriotarrak aurretik jarri ziren markagailuan. Partida gogorra izan arren, oriotarrek partida irabaztea lortu zuten.
Asteburuan lortutako emaitzei esker, OBBko neskek ligako lehen garaipena lortu zuten. Hala, taldeko kideek azpimarratu dute Carla Novellak eta Igone Etxeberriak egindako lana.
Hurrengo asteburuan oriotarrak Galizira bidaiatuko dute, eta CBS Cambre izango dute aurkari.