Orioko Udalak herri-baratzeetan izena emateko epea zabalduko du bihar, baratzeak adjudikatzeko prozedura lehenbailehen martxan jartzeko. Hala, herri-baratze bat erabili nahi dutenek bihar hasi eta hilaren 25era bitartean aurkeztu dezakete eskaera Orioko udaletxean. Guztira, 45 partzela daude adjudikatzeko; horietako sei zuzenean esleituko zaizkie lursailen gaur egungo erabiltzaileei, lau urterako, eta 40 metro koadroko beste 39 partzela geratuko dira libre.
Eskaerak aurkezteko epea amaitzen denean, uztailean, zozketa egingo da ekimenean izena eman dutenen artean.
Honako baldintzak bete behar dituzte erabiltzaileek zozketan sartzeko:
- Orion erroldatuta egotea eta herrian bizitzea (gutxienez, azken sei hilabeteotan)
- Orioko Udalarekin zorrik ez izatea
- Familia-unitatean ez izatea beste inor baratze ekologiko baten erabiltzaile dena
- Baratzen araudia ez betetzeagatik aurrez zigorrik ez jaso izana
- Baratzea erabiltzeko baimenak irauten duen bitartean Orion erroldatuta izatea
- Ez eskatzaileak eta ez haren etxeko inork ez izatea nekazaritzarako egokia den terrenorik jabetzan edo usufruktuan
Eskaera orria
Eskaerak aurkezteko honako eredu ofizial hau erabili behar da, eta nortasun-agiriaren kopia ere aurkeztu beharko da eskaera orriarekin batera. Udaletxean bertan entregatu edo erregistroa korreo elektronikoz ere egin daiteke, eredu ofiziala erabilita
Hitzaldia ekainaren 22an
Herri-baratzeen ezaugarriak, erabiltzeko baldintzak eta erabiltzaileen betebeharrak azaltzeko hitzaldia antolatu du udalak ekainaren 22rako. Arraunetxen izango da, 19:00etan, eta Ekoguneko eta KimuBat enpresako kideek emango dute.