Atzo iluntzean Txurrumuski Aisialdi Taldeak mezu elektronikoa bidali zien gurasoei, euren seme-alabak udaleku irekietan onartuak izan zirela azalduz. Guraso asko kezkatuta zeuden, hasiera batean jakinarazi zutelako zozketa egingo zutela, uste baino haur gehiagok izena ematen bazuten. Dena dela, haur guztiak onartuak izan daitezen ahalegina egin du Txurrumuskik. Olatz Lizaso HH2 eta HH3ko ikasle taldeen arduradunak azaldu duenez, "parte hartze handia izan dugu, baina inor kanpoan utzi nahi ez genuenez, Orioko Udalarekin hitz egin genuen azpiegitura gehiago eskatzeko. Uneoro jarrera oso ona izan du udalak eta udaleku irekietarako ludoteka, musika eskola, pilotalekua eta Ikastolako DBHko eraikina erabiltzeko baimena eman digute".
Txurrumuskiko kideek, gainera, azaldu dute COVID-19aren aurkako babes eta segurtasun neurriak erabiliz, haurrek aire librean jarduerak egiteko eta ondo pasatzeko aukera izango dutela udan. "Herriko familiek uda sasoian haurrak udaleku irekietara eramateko beharra eta gogoa dute, baina aurtengoak ez du zerikusirik izango aurreko udako zaintza zerbitzuarekin. Iaz burbuila taldeak mantentzen saiatu ginen eta horretarako areto itxietan bildu ginen. Aurten, berriz, haurrek aire zabalaz eta jolasez gozatzea nahi dugu, beti ere burbuila taldeak mantenduz. Uste dugu haurrek udaz gozatzeko eta oso ondo pasatzeko aukera izango dutela. Udaleku irekiak hasteko irrikaz gaude, beraz", adierazi du Lizasok.