Eusko Jaurlaritzak plazaratu berri duen txostenaren arabera, atzo lau positibo zenbatu zituzten Orion, eta gora egin du intzidentzia tasak: 391,39koa da. Gaur-gaurkoz, Orio da eremu gorritik kanpo dagoen eskualdeko herri bakarra, eta hori ere oso gertu dago 400eko muga horretatik. Aian, bestalde, ez zuten positibo berririk hauteman.
Herenegun baino hamar koronabirus kasu gehiago zenbatu zituzten atzo Urola Kostan; denera, 33. Orokorrean, duela aste batzuk baino hobea da egoera, baina jaitsiera oso pausatua da, eta intzidentzia tasei asko ari zaie jaistea kostatzen.
Zarautzen zortzi kasu zenbatu zituzten atzo, baina, hala ere, behera egiten jarraitzen du herri horretako intzidentzia tasak egunez egun, oso apurka bada ere. Azpeitian eta Zumaian sei eta bost kasu zenbatu zituzten atzo hurrenez hurren, eta mantendu egin da intzidentzia tasa herri horietan. Azkoitian, berriz, kasu bakarra zenbatu zuten atzo, eta behera egin du tasak herri horretan. Gainontzeko kasuak Getarian (lau), Zestoan (lau) eta Errezilen (bat) zenbatu zituzten atzo.
ZIUen okupazioa, beherantz
Atzo 9.093 PCR eta antigeno proba gauzatu zituzten Osakidetzak eta Osasunbideak Hego Euskal Herrian, eta proba horietan 1.204 lagunek eman zuten positibo –1.117k herenegun–. Zehazki, 466 kasu atzeman zituzten Bizkaian, 220 Gipuzkoan, 213 Nafarroan eta 182 Araban. Lurralde horietatik kanpo bizi diren 23 lagunek ere eman dute positibo azken orduetan. Datu horiek tarteko, positibotasun tasa %12,1 da gaur-gaurkoz Araban, Bizkaian eta Gipuzkoan, eta %12,4 Nafarroan.
Ospitaleetako egoera, berriz, gorabeheratsua da. Atzo 47 lagun ospitaleratu zituzten Araban, Bizkaian eta Gipuzkoan, eta herenegun baino gutxiago izan baziren ere, ospitaleratuta dauden pertsonen kopuruak gora egin du atzotik. Egun, 281 lagun daude Osakidetzaren mendeko erietxeetan COVID-19aren ondorioz ospitaleratuta, herenegun baino hamabi gehiago. ZIUetan, ordea, atzo baino bi lagun gutxiago daude (62). Nafarroako ospitaleetako datuak apur bat okerragoak dira herenegungoekin alderatuta. Bi lagun gehiago daude ospitaleratuta (95), eta zainketa bereziak behar dituztenak ere herenegun baino bi gehiago dira (25).