Eusko Jaurlaritzaren Osasun Sailak argitaratu ditu atzo, asteartea, egindako PCR eta antigeno proben emaitzak, eta beste kasu positibo bat hauteman dute Aian. Dena den, 654,19tik 554,16ra jaitsi da intzidentzia tasa. Bestalde, oraingoan ere ez da kasu berririk izan Orion, eta han ere behera egin du tasa metatuak, 81,54tik 48,92ra. Hala, eremu horia atzean utzi eta berdean sartu da herria.
Eskualdean, guztira, bost kasu bakarrik hauteman dituzte azken orduetan. Bost positibo horietatik lau Azpeitian zenbatu dituzte (bestea Aian, esan bezala). Hala eta guztiz, behera egin du Azpeitiko intzidentzia tasak ere, eta 164,26an dago une honetan.
Urola Kostako gainontzeko herrietan ez dute kasu berririk hauteman; horrenbestez, intzidentzia tasetan ez da gorakadarik egon. Azpeitiaz gain, 5.000 biztanletik gorako herrietatik beste hiru daude eremu horian: Azkoitia (108,49), Zarautz (111,36) eta Zumaia (61,06). Beste herrietan honakoak dira intzidentzia tasak: Aizarnazabalen, Beizaman eta Errezilen zero, Getarian 35,34 eta Zestoan 154,08.
%1,2ko positibotasun tasa
Hego Euskal Herriko datuei dagokienez, atzo, guztira, 9.231 PCR eta antigeno proba egin zituzten lau lurraldeetan, eta horietatik 112 izan ziren emaitza positiboa eman zutenak. Lurraldez lurralde, Bizkaian atzeman zituzten kasu gehien (43), eta, ondoren, Gipuzkoan (32), Nafarroan (23) eta Araban (hamahiru). Horrez gain, lurralde horietatik kanpoko pertsonak batek ere positibo eman zuen proban. Bestalde, positibotasun tasa %1,2 da lau lurraldeetan.
Ospitaleetan, berriz, 126 pertsona daude Araban, Bizkaian eta Gipuzkoan, eta horietatik 39 dira ZIUetan daudenak. Nafarroan, aldiz, 42 pertsona daude erietxeetan, eta horietatik hamar daude ZIUn.