Bihar, azaroak 10, Memoriaren Eguna izango da, eta horren harira, bi ekitaldi antolatu ditu Orioko Udalak. Lehendabizikoa ostegunean izango da: Aranzadi Zientzia Elkarteko ikertzaile Javier Bucesek Giza eskubideen urraketen ikerketa: Orio hitzaldia emango du, Kultur Etxean, 19:00etan hasita. Besteren artean, memoriaren garrantziaz, Orion egiten ari diren ikerketek herriari egindako ekarpenez, horietatik jasotako ikasketez eta herritarrek ikerketan parte hartzeko duten moduaz jardungo du.
Hain zuzen ere, Orioko Udalak eta Herritarren Foroak hala adostuta, herrian izandako giza eskubideen urraketak aztertzeko hitzarmena sinatu zuten iaz udalak eta Aranzadi Elkarteak. Azterketaren helburua da memoria historikoa eta gertuko memoria ikertzea, bi alditan bereizita: batetik, gerra zibilean eta ondoko bi hamarkadetan (1936-1959) izandako giza eskubideen urraketak (memoria historikoa) eta, bestetik, 1960tik gaur arte izandakoak (gertuko memoria). Herritarren testigantzak biltzeko, bulego bat jarri zuen Aranzadik kultur etxean iazko urrian eta azaroan, eta datozen hiletan ere ildo beretik jarraituko dute lanean.
Bigarren ekitaldia azaroaren 17rako antolatu dute, eta Irati Goikoetxea idazlearen eta Miguel Angel Llamas Pitu kazetariaren arteko solasaldi bat izango da; hori ere Kultur Etxean eta 19:00etan hasita. Goikoetxeak Herriak ez du barkatuko eleberria aurkeztu berri du; aita ETAk hil zion neska bat da liburuko protagonista, eta hogei urte beranduago bizirik jarraitzen duen zauriaren ingurukoak ditu aztergai. Llamasek, berriz, Amaia Merino zinemagilearekin batera, Non dago Mikel? dokumentala estreinatu zuen iaz Donostiako 68. Zinemaldian. 1985ean Guardia Zibilak atxilotu ondoren desagertu zen Mikel Zabalzaren kasua du oinarri dokumentalak.