Beste urte batez, Orioko Atletismo Taldeak urte amaierako San Silvestre lasterketa antolatu du udalaren laguntzarekin. Izen ematea zabalik da jada, eta aurtengo berrikuntza moduan, herrikrosa.eus atariaren bidez egin beharko da, eta 8 euroko kostua izango du. Abenduaren 31n, goizeko 11:00etan, izango da lehen hitzordua, eta adinaren araberako taldeetan banatuta hartuko dute parte HH5etik DBH2ra arteko gaztetxoek.
HH5etik beherako haurren 150 metroko proba hasiko da ordu horretan, LH1 eta LH2ko umeena 11:10ean, eta 300 metrotan egin beharko dute lasterka. 11:20an, berriz, LH3 eta LH4ko haurren txanda izango da, eta 600 metroko proba izango dute. 11:30ean, amaitzeko, LH5, LH6, DBH1 eta DBH2 mailakoek egingo dute korrika, 1.700 metro osatu arte. Gaztetxoek ez dute aurrez izenik eman behar, eta lasterketa doakoa izango da haientzat.
Helduen proba, aldiz, 12:00etan abiatuko da, eta 5.000 metro inguruko ibilbidea egingo dute guztira: 1.700 metroko buelta txikia eta 3.300 metroko buelta handia. Azken urteetakoarekin alderatuta, hondartzako zatia laburragoa izango da aurten. Sariei dagokienez, lehen hiru emakumeentzako eta gizonentzako garaikurrak izango dira, eta parte hartzaileen artean sariak zozkatuko dituzte.