Azaroaren 10ean Memoriaren Eguna izango da, eta horren harira, urritik abendura bitartean hainbat jarduera antolatu ditu Orioko Bizikidetza Batzordeak. Horietan hirugarrena, azaroaren 8an egingo dute, datorren asteartean: Lander Garroren Tipularen sehaska kanta dokumentala emango dute kultur etxean, 19:00etan hasita. Doakoa izango da.
Sare Herritarrak eta Gastibeltza Filmak ekoiztetxeak sustatutako proiektua da Tipularen sehaska kanta. 2021ean crowdfunding kanpaina jarri zuten abian, eta 16.000 eurotik gora bildu zituzten ikus-entzunezko lana finantzatzeko. 1942an kartzelan hil zen Miguel Hernandez poeta valentziarraren Nana de la cebolla olerkia du oinarrian, eta analogia historikoa egiten du filmak: 1936ko gerran preso hiltzeak zentzurik ez bazuen, zentzurik ba ote du gaur? Garroren proiektua 2022ko otsailean estreinatu zen Donostian, eta udaberrian herriz herri aurkeztu dute dokumentala.