Gipuzkoako Foru Aldundiak, Bidegi foru sozietatearen bitartez, argi berdea eman dio Orioko lotunearen (Bilborako norabidean) ondorengo bihurguneen segurtasuna hobetzeko obrari. Azaldu dutenez, gaur egun, "gidari batzuk hirugarren erreia ia amaitu arte ez dute alboko erreira aldaketa egiten eta, batzuetan, ezusteko maniobrak egiten dituzte bihurgune betean eta abiadura handian". Egoera horiek ekidin nahi dituzte. Hala, gaur atera dute lizitaziora AP-8an, Orion, bide-segurtasuna hobetzeko proiektua.
Lanak, asteburuan
Esku-hartzea 34. eta 35. kilometroen artean egingo da, Bilborako noranzkoan. Aurrekontua, berriz, 456.918 eurokoa (gehi BEZa) izango da eta hasierako aurreikuspenen arabera, hiru hilabeteko iraupena izango dute obrek. Hirugarren erreiaren amaiera 750 metrotan aurreratzea aurreikusten dute, bihurguneen erradioak handituko dira eta trazadura leunduko da. Zorua ere berritu egingo da.
Trafikoari ahalik eta gutxien eragiteko, lanak asteburuetan egitea aurreikusten da; ez du eragingo Orioko irteeran.