Gizartearen digitalizazio prozesua eta iraunkortasunaren aldeko apustuak "nabarmenak" direla argudiatuta, Urola Kostako Udal Elkarteak, Gipuzkoako Merkatarien Federazioarekin lankidetzan, eskualdeko profesionalei zuzenduriko trebakuntza eta formakuntza eskaintza diseinatu du.
Zehazki, bi ikastaro eskainiko ditu, bata martxoan eta bigarrena iraila eta urria bitartean, biak merkataritza eta zerbitzu sektoreko profesionalak digitalizazio zein iraunkortasunaren alorretan trebatzeko.
Lehen trebakuntza ikastaroa martxoaren 6an hasi eta 29an amaituko da. Ikastaro honek digitalizazioa izango du ardatz eta saltokien online eta offline esperientzien konbinazioa izango ditu oinarri. Hortik abiatuta, ikastaroaren helburua da parte-hartzaileei bi espazio horietan elkarbizi dezaketen edukiak sortzen laguntzea eta horretarako beharrezkoak diren erremintak eskaintzea.
Irailean eskainiko dute zikloaren bigarren txanda, kasu honetan, enpresentzako iraunkortasun tekniketan oinarrituta, eta helburu izango du parte hartzaileei ekintza iraunkor nagusien azterketa eta analisia egiteko ezagutza eta trebetasunak ematea, elementu bereizle gisa.
Izen-ematea, irekita
Ikastaroan parte hartu nahi dutenek, mezu bat bidali beharko dute enpresa@urolakosta.eus helbidera ondorengo datuak zehaztuz: NAN zenbakia, enpresaren izena, harremanetarako pertsonaren izen-abizenak, posta elektronikoa, telefono zenbakia eta intereseko ikastaroak.