Udaltzaingoaren espazio berria herritarrei ezagutarazteko, ateak irekitzeko eguna egin zuen Udalak pasa den astean. Hurrengo egunetan, udaltzainek bulego zaharretik berrirako aldaketa egin zuten, baina egun batzuk behar izan dituzte instalaziora erabat egokitu eta zerbitzua osotasunean berraktibatzeko. Zentzu honetan, Orioko Udaletik jakinarazi dutenez, dagoeneko normaltasun osoz ari dira zerbitzua Eusko Gudariko kaleko 54. zenbakian dagoen bulegotik eskaintzen. Udaltzaingoen bulego berria 7:30etik 21:00etara egongo da zabalik, egunero.
Azpiegiturei dagokienez, bulego berria "modernoagoa eta irisgarriagoa" da. Herritarrak artatzeko mostradore zabala du sarreran, eta salaketak jartzeko eta indarkeria matxistaren biktimak artatzeko egokitutako espazioak. Galdutako objektuak ikusgai daude halaber, itxitako erakusleiho batean, erraz identifikatzeko moduan.