Gaur goizaldean matrakak oriotar asko esnatu egingo ditu. Inguruko herri gehienetan ohitura galduta badago ere, Orion bizirik eutsi zaio Ostiral Santuan herritarrei matraka erabilita deitzeari. Matraka Taldeko kideek azaldu dutenez, "Ostegun Santutik Larunbat Santura bitartean kanpaiak isildu egiten ziren, eta elizaren ohitura zen kanpaiak mutu zeudenean herritarrei deitzeko Matraka –soinu lehorra– erabiltzea". Aurten ere, 03:00etan abiatuko du ibilbidea Matraka Taldeak eta 05:00etan bukatuko dute, herria zeharkatu ondoren.
Herrian ohitura bada ere, aitortu dute bizilagun berriek ez dutela matraka ezagutzen, eta "zenbaitetan irainak eta ur baldekadak" ere jaso izan dituztela, "batzuei ez zaie gustatzen goizaldean matrakaren soinu lehorrarekin esnatzea".