Atzo arratsaldean abiatu zuten Karela kiroldegian, emakumezkoen jubenil mailako Espainiako Txapelketako B sektorea. Bi partida jokatu ziren lehen jardunaldian. Lehendabizi, Calfirma Cardaballalek CD Iplacea izan zuen aurkari eta Galiziako taldea nagusitu zen 23-19 emaitzarekin.
Jarraian, 19:30ean hasita, etxekoen txanda izan zen eta Sinergia Orio Eskubaloiak Anaitasuna izan zuen aurkari. Azken norgehiagoka horretan kiroldegia Orioko Eragin taldeko zalez bete zen, eta animo oihuez eta bonbo hotsez "indarra" eman zioten etxeko taldeari. Ez zen partida erraza izan oriotarrentzat, 27-40 emaitzarekin Iruñeko taldeak lortu baitzuen garaipena. Dena dela, "gogor eutsi" zioten neskek azken unera arte. Nahiz eta markagailuan atzetik joan, partidaren bukaera arte "borrokatu zuten, amorerik eman gabe eta sartutako gol bakoitza ospatu zuten". Taldeko entrenatzaile Ane Merketegiren iritziz, "sekulako kasta" erakutsi zuten neskek, eta zaleek emandako babesa "ikaragarria eta txalotzekoa" izan zela azpimarratu du.
Atzokoa atzean utzita, "gaurko partidan kontzentratuta" daude Orio Eragineko neskak. Gaurkoan CD Iplacea taldea izango du aurkari Sinergia Orio Eskubaloiak, 18:30etik aurrera. 16:30ean, berriz, Calfirma Cardaballal eta Anaitasunaren arteko partida ikusteko aukera izango da.
Bihar, maiatzaren 7a
- 10:30. Anaitasuna - CD Iplacea
- 12:30. Sinergia Orio Eskubaloia - Calfirma Cardaballal