Orio Arraunketa Elkarteko harrobiko arraunlari gazteak, kimu, infantil eta kadete mailakoak, Libourneko Nazioarteko Estropadan parte hartu dute asteburuan. Bordeletik (Frantzia) 25 kilometrotara dago herria, eta bertakoa "estropada eremu olinpiko onenetakoa" dela nabarmendu dute elkarteko kideek; hala, uste dute "esperientzia hartzeko" balio izan diela estropadak. Guztira, 91 arraunlari izan dira Frantzian, eta bederatzi ontzi aurkeztu dituzte txapelketara.
Larunbatean jokatu zuten lehen jardunaldia eta 13 ontzi eta 65 arraunlari oriotar lehiatu ziren Libourneko uretan; hain zuzen ere, zortzi ontzik lortu zuten final nagusirako sailkatzea, domina lortuz. Emakumezkoen kadete mailako zortzikoak, esaterako, garaipena lortu zuen. Horrez gain, zilarrezko hiru domina ere eskuratu dituzte oriotarrek: kadete mailako mutilen zortzikoak eta kimu mailako mutilen A skull zortzikoak eta A lemazaindun skull laukoak. Brontzezko domina eskuratu zuten taldeak, berriz, lau izan ziren: kadete mutilen lemazaindun laukoa, eta kimu mailako B skull zortzikoa, B lemazaindun skull Laukoa eta skull bikoa.
Igandeko jardunaldian, 26 arraunlari oriotarrek parte hartu zuten sei ontzitan banatuta, baina inor ez zen final nagusirako sailkatu eta B finalak jokatu zituzten; horietatik bi ontzik lortu zuten B final txikia irabaztea.
Honako hauek dira Libourneko Nazioarteko Estropadan urrezko domina lortu duten arraunlariak: Amane Basurko, Irati Olaizola, Maddi Erguin, Maialen Arostegi, Elene Urrestilla, Nahia Gonzalez Txabarri, Lia Gaztañazpi, Iraia Aizpurua eta Mireia Torres (lemazaina).