Frantziako Tourra Oriotik igaroko da uztailaren 3an, astelehenarekin. Egun horretako etapa, Amorebieta-Etxanon hasiko da, eta txirrindulariak Oriotik pasako dira. Hain zuzen ere, Zarauztik etorriko dira, eta N-634 errepidetik egingo dute Usurbil aldera. Txankako errotondan, Igeldoko errepidea hartuko dute, eta handik jarraituko dute Donostiarantz. Aurreikuspenen arabera, txirrindulariak 15:10-16:10 artean pasatuko dira Oriotik.
Horregatik, N-634 errepidea eta Igeldoko errepidea 12:00etatik 17:00ak arte egongo dira itxita. Tarte horretan, ezin izango da herritik irten edo herrira sartu, antolakuntzako eta parte-hartzaileen ibilgailuak etengabe pasako baitira ibilbidetik.
Kontainerrak lekuz aldatuko dituzte
Probaren segurtasuna bermatzeko asmoz, ibilbideko hainbat tokitako kontainerrak lekuz aldatuko dira. Ekainaren 26an egingo da aldaketa, eta uztailaren 4tik aurrera bueltatuko dituzte beren lekuetara. Kokaleku hauetako kontainerrak mugituko dira: Aita Lertxundi, Ibai Ondo, Anibarko Portua, Txanka, Benta aldea eta San Martin.