Ekainaren 28a izango da LGTBIQ+ Komunitatearen Nazioarteko Eguna, eta horren harira, Orioko LGTBIQ+ komunitateko kideak Ibai ondo kaletik eta moilatik N-634 errepideko zubira igotzeko eskailerak ostadarraren koloreekin margotzen ari dira, lehendik emandako kolorea dagoeneko oso ajatua zegoelako.
Bestetik, LGTBIQ+ komunitatearen aldeko banderolak saltzen ari dira Orioko Emakumeen Ahalduntze Eskolan, eta salatu dute kolektiboaren ekitaldien berri ematen duten kartelak herriko paneletatik kendu dituztela batzuek. Orioko Udalak horrelako jokabideak "erabat gaitzesten" dituela jakinarazi du, eta "kolektiboaren ikusgarritasunaren eta aldarrikapenaren alde lanean jarraitzeko konpromiso irmoa" adierazi du. Azaldu du lanketa-prozesu hori Ahalduntze Eskolaren bidez bideratuko dela.
Diagnostikoa
Orioko Udalaren aditzera eman duenez, Orioko Ahalduntze Eskola zuzentzen duen Pertzertik Elkarteak 2019an egin zuen diagnostikoan LGTBIQ+ kolektiboko kideek "testigantza adierazgarriak" bildu zituzten. Hala, bertan jaso zuten hainbat herritarrek "presio soziala, begiradak edota komentario iraingarriak" jasaten dituztela "sexu bereko bikote-harremanak aske adierazteagatik eta genero bakoitzari egotzitako jokabide eta roletatik urruntzeagatik". Horregatik, herri mailan "matxismoa, sexismoa eta lgtbiq+fobiaren inguruan sentsibilizazio-lana egiteko beharra" nabarmendu zuten txostenaren egileek, "modu intersekzional eta zeharkakoan, denok norabide berean jarduteko: familietan, eskoletan, Udalean, kalean…"