Astelehenean eskualdetik igaroko den Frantziako Tourra txirrindularitza lasterketak trafikoan ez ezik, zaborraren kudeaketan ere izango du eragina. Hori horrela, gaurtik uztailaren 4ra, asteartea, Orioko hainbat edukiontzi gune lekualdatu edota kenduko dituzte lasterketan parte hartuko duten txirrindularien segurtasuna bermatzeko. Nolanahi ere, aldaketaren eragina pairatuko duten herritarrei bermatuko diete beren zaborra beste gune batean bota ahal izatea.
Zehazki, Aita Lertxundi kaleko 8. 22. eta 50. zenbakietako edukiontziak lekualdatuko dituzte eta gauza bera egingo dute Ainbarko portuan, Lusarbe merenderoan, eta Txanka aldeko 5. eta Benta aldeko 10. zenbakietan ere. Zaborra aipatu guneetan botatzen duten Orioko bizilagunek, gune bakoitzean izango dute zehaztuta beren zabor bilketa gune berria.
Horrez gain, San Martin auzoko Aizperro baserriaren inguruan dauden edukiontziak kenduko dituzte eta zaborra bertan botatzen duten herritarrek inguruko beste edukiontzietan izango dute alternatiba. Aldaketek iraun bitartean, orain arte bezala, hondakinak ondo sailkatzen jarraitzeko deia egiten diete herritarrei.