Trapu Zaharra antzerki konpainiak Turistreando antzezlana eskainiko du ostiral arratsaldean, 20:00etan hasita, Antilla hondartzan. Ruben Ontiverosek idatzi du antzezlanaren gidoia, eta Santi Ugalde eta Mila Espiga dira aktore nagusiak, Isidoro Fernandezen gidaritzapean. Antzezlanak udan puri-purian dagoen gaia jorratuko du umorea baliatuz, turismoa. Izan ere, bidaia agentzia batek stand bat jarriko du kalean, nahieran antolatu daitezkeen bidaia birtualak saltzeko. "Itsasontzian egindako bidaiarekin oso pozik dagoen emakume bat aukeratuko dute bidaia birtualak nola antolatzen diren zuzenean erakusteko. Bidaia horretan, bere fantasia guztiei bide emango die".
Orioko Udaletik jakinarazi dute, hasiera batean, eguraldiak laguntzen badu, Antilla hondartzan izango dela ordubeteko emanaldia, baina eguraldi kaskarra egingo balu Herriko Plazara leku aldatuko dute. Hala, ostiralean bertan jakinaraziko du udalak behin betiko kokalekua.