"Pello! Nikolasa!" zioten atzo arratsaldean herriko haurrek eta hainbat galdezka ziren zein ziren gainontzeko erraldoia. "Hori Oteiza ba" erantzuten zieten beste batzuk. Bada, atzokoan Jorge Oteizaren erraldoia aurrez aurre ezagutzeko aukera izan zuten Orioko haurrek. Artista oriotarra jaio zela 115 urte bete ziren atzoko egunez, eta hori kontuan hartuta, bere erraldoia herrira ekarri zuten, Egues Ibarreko konpartsarekin batera.
Batzuk pozik ziren, beste batzuk ez hainbeste. Kontuak kontu, jende ugari bildu zen hitzorduan. Hendaia plazan hasi zuten ibilbidea. Pello eta Nikolasa erraldoiek egin zieten harrera Jorge Oteizari, Pepita Uriz irakasleari eta Peio eta Irati dantzariei. Argazkia atera eta herriko plazara abiatu ziren. Bertan egin zuren bigarren geldialdia, Oteizak Victor Enbili osaba pilotariari egindako harrizko bustoaren parean. Jarraian, gaiteroen musikak lagunduta, Eusko Gudari kaletik barrena joan eta Arrantzale kaletik itzuli ziren erraldoiak. Elizako zimitorioaren azpian dagoen Pietatearen egurrezko erreplikan egin zuten azken geldialdia.