Pasa den asteburuan, Orioko Atletismo Taldeko kideak Zornotzako nazioarteko krosean eta Donostiako 15 kilometro eta 5 kilometrotako lasterketetan hartu zuten parte, eta "emaitza bikainak" lortu dituzte.
Zornotzan, 18 urte azpiko lasterketan, Martin Iriondo oriotarra izan zen garaile 15:01 denborarekin, 4,7km lasterketan. Bertan Sunhai Uhegunek ere hartu zuen parte. Azken honek lasterketa txukuna egin zuen. 20 urte azpikoetan, Xabat Elortzak laugarren postua lortu zuen; 15:24ko denborarekin amaitu zuen 4,7 kilometrotako lasterketa. 14 urte azpikoetan, taldeko hiru neskek hartu zuten parte 2,7 kilometroko zirkuituan; Xare Elortza hamaikagarren postuan amaitu zuen, Elaia Lasartek hamabosgarren bukatu zuen proba, eta Djiara Ndaok, berriz, haren atzetik, hamaseigarren geratu zen.
Donostiako lasterketari dagokionez, 15 kilometroko Klasika lasterketan, Iñigo Exposito izan zen proba amaitu zuen lehen taldekidea; zortzigarren amaitu zuen lasterketa. Beste hainbatek ere hartu zuten parte Behobiarako prestaketa gisa, eta "gauzak ondo" doazela erakutsi zuten, bakoitzak bere helburuak beteaz.