Sabelak eta zintzurrak goxatzen ari dira oriotarrak gaur goizetik hasita. San Nikolas bigarrena da, parranda eguna ere bai, eta eguraldiak lagundu ez arren, jendez bete da plaza eguerdi partean sagardo dastaketaren aitzakian. Bakioko (Bizkaia) Txeroke txarangakoek girotu dute hitzordua, eta kantuan jarri dute bat baino gehiago.
Horren aurretik, herriko erretiratu asko Zaharren Babeslekuan elkartu da urteroko hamaiketakoa egiteko. Salda beroa, txorixo egosia eta ardoa nahiz sagardoa hartzeko aukera izan dute, eta zerbitzari lanak egiten aritu da alkatea bera ere.
Jende gehien, dena den, Karela kiroldegian elkartu da 14:30 inguruan, han ari baitira egiten ordu honetan sanikolasetako herri bazkaria 400 lagun inguru. Familia asko elkartu da, baita lagun talde andana ere, bapo jan eta edateko gogotsu batzuk, eguna lagunartean igarotzeko pozik beste asko.
Gaurko egitarauak arratsalde partean jarraituko du, eta bihar izango da festetako azken eguna.