Orio Eragin eskubaloi klubak jarduera ugari antolatzen ditu Gabon garaian, eta horietako bat da eskubaloi topaketarena. Aurten, hirugarrengoz antolatu du kirol taldeak, eta giro ederra sortu da beste behin ere Karela kiroldegian.
Goizean goiz hasi dira partidak, eta iluntzera bitarte izango dira kimuen eta haur-kategorien arteko norgehiagokak. Zale ugari ere gerturatu da kirolaz gozatu eta jokalariak bertatik animatzera. Bertaratzen direnek, gainera, Orio Eragin eskubaloi kluba diruz lagundu ahal izango dute otarre eder baten zozketan parte hartuta. Zozketa 19:00etan egingo dute, Karelan bertan.
