Gipuzkoako Hondartzen Mahaia bildu da gaur goizean, pinportak kostaldera iristeko mehatxuaren aurrean ekintza bateratuak ezartzeko asmoz. Bileran izan dira Orioko alkate Anuska Esnal, Getariako alkate Haritz Alberdi, Zumaiako alkate Iñaki Ostolaza eta Zarauzko Zerbitzuetako zinegotzia den Iban San Martin eta Gloria Vazquez, Ingurumeneko zinegotzia.
Gipuzkoako Foru Aldundiko Jasangarritasun Departamentuak koordinatu du hitzordua. Bertan, Gipuzkoako hondartzetara pelletak iristeko mehatxuaren aurrean, gaur egungo egoeraren berri eman zaie udal-arduradunei, eta Gipuzkoako Foru Aldundiko Jasangarritasun Departamentuak ezarritako jarduera koordinatuko protokoloaren zirriborroa jakinarazi da.
Hala, Portugalgo uretatik datozen pelletak Gipuzkoako kostaldera iristeko arriskua dagoela ikusita, alerta-fasean gauzatuko diren jarduketak ondorengoak izango direla zehaztu da:
- Hondartza guztiak egunero zaindu eta ikuskatzea: Zaintza-zerbitzua sendotuko da, obra-zuzendaritzako hiru pertsonak eta zuzendaritzako bi teknikarik parte hartuta.
- Garbiketa-zerbitzua indartzea: 15 pertsonako garbiketa-ekipo gehigarri bat jarriko da.
- Pellet-laginak biltzea: Hondartzen arabera bereizitako eta etiketatutako poltsetan bilduko dira laginak, AZTIrekin koordinatuta, laginak bidaltzeko eta alderatzeko, Galiziatik datozen laginen zain.
- Larrialdi-faserako baliabide materialak eskuratzea: 100 zedazo eta kubo erosi dira, bai eta ontziak, edukiontziak eta bahegailu trinkoak ere.