Atzo arratsaldean Iñaki Iurrebaso soziologo, EHUko irakasle eta UEMAko ikerketa-teknikariak hitzaldia eskaini zuen Orioko Salatxo aretoan, Euskararen egoera gaur. Zer diote datuek? izenburupean. Orioko Udaleko Euskara Sailak espero baino jende gehiago bildu zen hitzorduan, 30 bat lagun, eta interesgarria izan zela nabarmendu du Orioko Udaleko Euskara teknikariak. "Lehenbiziko kolpean, Iñaki Iurrebasok eman zituen datu batzuk etsigarriak ematen zuten, baina hori da daukagun errealitatea eta komeni da gauzak diren bezala ikustea, aurrerabidearekin asmatzeko". Ondoren, testuinguru horretan aurrera egiteko pista batzuk eman zituen adituak: "Azaldu zuen arnasguneak benetan sendotzeko politikak aktibatu behar ditugula; eskoletan ahozkotasunari erabateko lehentasuna eman behar zaiola, funtsezkoa delako euskaraz gaztelaniaz baino hobeto moldatzen diren hiztunak sortzea, eta horiek direlako gero erabileraren motorra…", aipatu du Zabaletak.
Ordu eta erdiko hitzaldia izan zen eta, bukaeran, herritarrek galdera dezente egin zizkioten Iurrebasori. "Badago interesa gaiarekin eta hori bera oso inportantea da, aurrerabidearekin asmatzeko".