Orioko Udalak 2019an onartu zuen Energia Plana, eta ordutik, energia aurrezteko neurriak hartzen ari da, energia berriztagarriak eta autokontsumoa sustatuz. Izan ere, udalak azaldu duenez, "energia gehien" kontsumitzen duen eraikin publikoa da kiroldegia.
Horregatik guztiagatik, hainbat lan egiten ari da udala azken asteotan. Igerilekuko teilatuan eguzki plaka fotovoltaikoak jartzen ari da, autokontsumoa sustatzeko. Halaber, ur beroa ekoizten laguntzeko, aerotermia sistema bat ere instalatuko du. Igerilekua berotzeko eta klimatizatzeko, berriz, hezetasuna kentzeko makina eta klimatizagailua jarriko ditu, eta kontrol-sistema osoa berrituko du.
Lan horiek eginda, udalak aurreikusi du gasaren kontsumoa % 30 murriztuko dela, eta argindarraren kontsumoa, berriz, % 25.
Kostuari dagokionean, 550.000 eurokoa da (BEZ barne), eta Gipuzkoako Foru Aldundiak kirol-ekipamenduak berritzeko dirulaguntza lerroaren bidez, 215.000 euro jasoko ditu Orioko Udalak.