OBB Orioko Bate Bizkorrak sofbol taldeak talde indartsua izan du aurkari joan den asteburuan, eta ezin izan du garaipenik lortu; Madrilgo CBS Rivas taldeak irabazi ditu bi partidak. Aurreko denboraldian Espainiako Ligako txapelduna izan zen talde hori.
"Egun korapilatsu batean, oriotarrek ezin izan zuten ezer egin talde madrildarraren erasoaldi indartsua geldiarazteko", adierazi dute OBBko ordezkariek. "Hala eta guztiz ere, gure jokalari gazteenen lan handia nabarmendu nahi dugu, oso ondo jakin baitzuten aukera aprobetxatzen jolasteko ez ezik, baita ikasteko eta erakusteko ere hain talde handiaren aurrean".
Datorren asteburuan, Valentziara (Herrialde Katalanak) joango dira oriotarrak, CBS Antorcha taldeari aurre egiteko.