Zenbat bizipen, emozio eta sentimendu bizi izan ditugu azken asteburuetan Eragin familiak!
Kadete mailan Euskadiko lau talde onenak izan genituen Karela kiroldegian. Jubenil mailan, aldiz, estatuko eskubaloi txapelketa bat izan dugu herrian lehen aldiz eta oso maila oneko eskubaloiaz gozatzeko aukera izan dugu. Kadeteek, gainera, Orioko izena Sevillaraino ere eraman zuten aurreko asteburuan.
Orio Eragin Eskubaloia zuzendaritza taldetik eskerrak eman nahi dizkiegu hau guztia aurrera ateratzea posible egin duten guztiei.
Udalari eta babesleei, zuen laguntza eta kolaborazioa oso garrantzitsuak izan dira guretzat.
Modu batean edo bestean lanean egon zareten guraso guztiei. Txikitasunetik gauza handiak egiteko gai garela erakutsi dugu.
Orioko herriari, bi aste hauetan Karelan bizi izan duguna ez dugulako erraz ahaztuko Eragin osatzen dugun guztiok! Eskerrik asko animatzera hurbildu eta hau aurrera ateratzen lagundu diguzuen guztiei!
Eta nola ez, Sukia Orio eta Sinergia Orio taldeei, (kirolari, entrenatzaile, delegatu…) Eskerrik asko herriari eman diozuen aukeragatik eta urte hauetan klubari emandako guztiagatik.
Orio Eragin Eskubaloi Klubeko Zuzendaritza Batzordea