Atzo arratsaldean egin zuten Urola Kostako Udal Elkarteak (UKUE) hauteskundeen eta tokian tokiko gobernu eraketen ondorengo lehen batzarra, datozen lau urteetarako lehendakaria eta lehendakariordea aukeratzeko. Azken bi agintaldietan EAJren esku egon bada, orain EH Bilduren gidaritzapean egongo da elkartea, eta Zarauzko EH Bilduko zinegotzi Ion Arozena izango da lehendakaria eta Orioko alkate Anuska Esnal lehendakariorde.
Arozenaz gain, orain artean UKUEko lehendakari izan den Lourdes Salsamendi ere aurkeztu zen kargurako EAJren aldetik. Bozketan, ordea, koalizio subiranistaren 36 boto jaso zituen Arozenaren eta Esnalen hautagaitzak. Salsamendik, berriz, EAJren eta PSE-EEren 30 jaso zituen.
Lehendakari berriak eskerrak eman zizkien eskualdeko herritarrei, eta bost udalerrietako "indarrak eta baliabideak batuz, hainbat zerbitzu hobetzeko" helburuarekin lan egingo duela esan zuen. “Herri guztiak maila berean daude eta hala tratatuko ditugu datozen lau urteetan. Bakoitzak bere ezaugarriak ditu baina denak batzen edo josten dituen gai amankomunak herrien arteko saretzea indartzeko erabiliko ditugu”, nabarmendu zuen Arozenak.