%2008.51.19.png)
Urola Kostako Udal Elkartearen Enplegu Zerbitzuak EMA+Indartzen ekimen berritzailearen 3. edizioa martxan jarriko du irailetik aurrera. Ekimenaren helburua da emakumeak erdigunean jartzea eta ahalduntzeko eta lan munduan murgiltzeko prestaketa eta aukerak eskaintzea; bereziki "laneratzeko zailtasunak dituzten" emakumeei dago zuzendua.
Programaren arduradunek zehaztu dutenez, "prestakuntza programarekin lortu nahi da emakume parte-hartzaileak ahalduntzea eta lan merkatuan murgiltzeko gaitzea, aldaketarako sendotuz, etengabeko hobekuntzarako bidea irekiz eta begirada-aldaketa eraginez, betiere, emakumeen laneratzea errazteko xedez". Horri lotuta, ekimen horrek "eskualdeko garapen eta ongizatean jauzi kualitatibo" berri bat egitea ahalbidetzen duela ere uste dute.
Programaren xehetasunak
EMA+Indartzen 40 orduko prestakuntza prozesua izango da, lau orduko hamar saiotan banatua. Ikastaroak bi aste iraungo ditu, hain zuzen ere, urriaren 20tik azaroaren 3ra. Saio guztiak goizez izango dira; 09:30etik 13:30era, Udal Elkartearen egoitzan. Taldekako prestakuntzaz gain, partaide guztiek bakarkako 3 aholkularitza saio jasoko dituzte online.
Ekimena hasi aurretik informazio saio ireki bat eskainiko dute interesa duten pertsonei programa honen berri emateko. Saio hori irailaren 26ean egingo da, asteartean, 10:00etan hasita, udal elkartearen egoitzan. Informazio saioan parte-hartzeko ezinbestekoa izango da aldez aurretik izena ematea ondorengo galdetegia beteta.