Aiako Guraso Elkarteak antolatuta, arimen gaua ospatu dute Aian. Plazan hasi da ospakizuna. Bertan elkartu dira haur zein guraso 18:00etan. Era guztietako mozorroak ikusi dira, beldurgarriak guztiak ere. Segituan, eguna iluntzen joan da eta abiatu dira herriko kaleetan zehar ibilbide misteriotsua egitera.
Beldurrari aurre egiteko balio izan dute trikiti doinuek; kalejiran ibili dira herritarrak. Lau geldialdi egin dituzte herrian zehar: Iturri kalean, plazan, Etxetxon eta hilerriaren kanpoaldean, hurrenez hurren. Haur bakoitzak geldialdi bakoitzean beldurrak paper batean idazteko aukera izan du, eta ordainetan gozokiak jaso dituzte. Esku bete gozoki, frontoira iritsi dira soinu eta pandero doinuekin. Bertan, sutan erre dituzte paperean idatzitako beldur guztiak. Dantzak eta txalapartak ere lekua hartu dute. Ondoren iritsi da tripak betetzeko unea, talo-jana izan baita.
Gau Beltza bukatzeko, sorpresa galanta izan dute herriko haurrek. Frontoian atzealdean joku misteriotsu bat antolatu dute, eta han ibili dira korrika eta garrasika beldurrari aurre eginez.