Urola Kostako Udal Elkarteak dirulaguntzak emango dizkie eskualdeko enpresei langabezian dauden pertsonak kontrata ditzaten. Lanbide-Euskal Enplegu Zerbitzuak finantzatuta, guztira 224.905 euro bideratuko ditu udal elkarteak horretara.
UKUEk ohar bidez adierazi duenez, dirulaguntza deialdiak helburu bikoitza du: "enpresei langileak kontratatzeko gastuei aurre egiten laguntzea", batetik eta "enplegu-politika aktiboak indartzea", bestetik, eskualdeko langabeen kontratazioa errazteko.
Dirulaguntza deialdian, lehentasuna izango dute emakumeak kontratatzen dituzten eskabideek, izan ere, gutxienez 17 dirulaguntza gordeko baitira emakumeak kontratatzen dituzten eskabideentzat.
Eskaerak egiteko epea urtarrilaren 31era arte luzatuko da, eta Udal Elkartearen egoitza elektronikoaren bidez aurkeztu beharko dira. Deialdiaren inguruko informazioa eta oinarrien xehetasun guztiak, berriz, hemen daude eskuragarri.