Plateruenak udazken honetan hamar urte bete ditu. Sasoi seinalatu eta aldakorrotan, ez-bai egoeran dago kafe antzokia. Urte gehiago betetzeko laguntza behar du, azpiegitura eraikitzeko asko zorpetu baitziren eta 250.000 euro bankuei itzuli beharrak egitasmoaren bideragarritasuna zalantzan jarri baitu.
Laguntza hainbat bidetatik, hamaika modutara, eman daiteke. Batetik, kultur egitasmoak gauzatzeko borondatezko lanean jarduten; bestetik, kulturgunearen etorkizuna ziurtatzeko diru ekarpenak egiten; hirugarrenik, Katamalorekin zuzenean grabatu zuten diskoa erosten.
Katamaloren diskoak Karkaran salgai
Ostalaritzaren laguntzaz bideragarria den Plateruenaren eguneroko kultur jarduera oparoarekin jarraitzeko, laguntza behar dute. Katamalo taldearekin elkarlanean, zuzeneko diskoa grabatu zuten kafe antzokian.
Diskoaren salmenta ahalik eta zabalena eta ugariena izatea gura dute; nagusiki, beren egitasmoa eta kanpaina bera komunikatzeko, eta bidenabar, diru-sarrera txiki batzuk izateko. Diskoak Durangoko Azokan jarriko dira salgai, baina aurretik, esklusiban, Tokikomeko hedabideetan erosteko aukera izango da. Karkara Tokikomen parte denez, diskoak hemen erosi daitezke 8 euroren truke.
Diru-ekarpen eta borondatezko lan kanpaina
Urtean 50.000 euro batuta zorra bost urtean ordaintzeko besteko laguntza eskatzen dugu; baita egun eta ekintza jakinetan boluntario jardunez laguntzea ere. Bi era horietara ere eman daiteke laguntza: diru-ekarpenarekin eta borondatezko lanarekin.
Ekarpen ekonomikoa egiteko A eta B aukerak daude. A aukerarekin 60 euro ordaindu behar dituzu urteko, bost urtean. Ekarpen horrekin lortuko dituzun hobariak ikuskizunetarako bi sarrera eta bi menu txartel izango dira. B aukerarekin 120 euro ordaindu beharko dituzu urtero eta hobariak ikuskizunetarako lau sarrera eta lau menu txartel izango dira. Horrez gain, kooperatibako kide izango zinateke.
Boluntario lanetan aritzea ere bada beste aukera bat. Urtean bost egunetan lagundu ezkero bi ikuskizunetarako sarrerak eta bi menu txartel jasoko zenituzke. Ekarpena egiteko informazio zabalagoa webgune honetan izango duzue: plateruenaren webgunea.