Imanol Artola berak, Naroa Anabitarte eta Juantxo Zeberioren galderei erantzun zien gero. Imanolek galdetu ziolarik bere kantuen edukien bilakaeraz, oharkabean, naturalki gertatuak izan direla erantzun zion, natur zikloak bailiran gertatu direla. Naroak tradizioa eta sorkuntza jarri zizkion aurrez aurre, eta tradizioa sorkuntzaren presondegi bilaka daitekeela esan zuen; tradizioa bidea eraikitzeko abiapuntu ona izan daitekeela, baina askatasuna dela gehien estimatzen duena eta saihestezina sorkuntzarako... Eta horrela joan ziren azaleratzen Benitoren sormen lanean eta jardun profesionala hobeto ulertzen lagundu ziguten kontu batzuk. Amaiera aldera, Zeberiok emandako hizpidea tarteko, sorkuntza jarrera dela esan zuen; sortzailea beti dagoela horretara, baita lotan ere, eta, esate baterako, ontzen ari den disko berrirako kantuetako bat amets batetik ekarria dela, ametsa bera ere kontatu zigun. Dena esate aldera, petralkeria iruditu zitzaidan entzule batek amaiera emateko kantu bat eskatu zionean abestiak ordaindu egiten direla erantzutea. Neurriz kanpokoa iruditu zitzaidan galdera, Benito ez zen hartara etorria-eta, baina asma zezakeen beste zer edo zer erantzuteko; eman zidan sortzaileek eta zaleok haien eskuragarritasunari buruz daukagun ikuspegiaz zer pentsatua.
Hau guztia, Zerkausi plaza azpian, Arraun Elkartearen gunean, ari zen gertatzen, gainean Bisigu Festa prestatzen ari ziren bitartean. Elkarrizketako tarte batean galdetu zion Zeberiok ea zer irudituko ote litzaigukeen tripa-janerako bezala arte-janerako 50 euro ordaintzea eskatuko baligukete; eta galdetu nion neure buruari zenbat jende erakarriko zuten bisigu-begiek eta zenbat Benitoren begiradek -ez ginen gutxi, ziento bat izango ginen eta-, doan izanda ere. Eta eman zidan zer pentsa. Gure sortzaileak azokara datozenen eskura jartzea, eskuragarri eta ikusgarri, da Galtzaundi Euskara Elkartea eta azokaren antolatzaileen helburua; ongi pentsatua hasiera-hasieratik eta maitasunez garatua azken hondarreraino. Pentsatu nuen antolatzaileek, kulturgileek, sortzaileek eta komunikabideok elkarren berri gehiago beharko genukeela, elkarren arrimuan zuku gehiago atera behar geniokeela honelako ekimen bikain bati, denok baitakigu gaur egun egitea bera bezain garrantzitsua dela egindakoa ikusaraztea, erakustea, nabarmentzea.