Iruñeako San Fermin Jaiak hastear dira, eta urtero bezala Aiako eta Orioko udaleku irekietako haurrek entzierro txikiak egingo dituzte, astelehenean.
Aian, 10:00ak aldean pregoia botako dute kultur etxe zaharretik, eta ondoren kalejira egingo dute trikitilariek lagunduta herrian barrena. Horrez gain, ohiturari jarraituz balkoietatik eta leihoetatik ura botatzeko ere eskatuko diete haur eta gaztetxoek aiarrei.
Bestalde, Orion goiz partean 2-3 urte bitarteko haurrek sanferminetako maskarak margotuko dituzte, lau urtetik gorako umeek herri-kiroletan parte hartzen duten bitartean. Ondoren, eguerdian ikastola berriaren kanpoko aldean bilduko dira denak, eta entzierro txikiak egingo dituzte taldeka, adinaren arabera bilduta.