1994ean argitaratu zuten Anjel Lertxundiren Otto Pette liburua. Editoreek "biharko klasiko bat" izango zela iragarri zuten, eta baita asmatu ere. 25 urte bete ditu aurten, eta urteurrenaren harira, euskal literaturari ekarri dionaz hausnartu dute hamaika egitasmotan.
Omenaldia Literaturian
Asteburu honetan, maiatzaren 10etik 12ra, Literaturia jaialdia izango da Zarautzen, seigarrenez. Zu, naiz, Ni zara izenburupean, Zarauzko kaleak hartuko ditu euskal literaturak: "Literatura saretu eta landu nahi dugu, irakurleak maitemintzeko", azaldu du Yoseba Peña antolatzaileetako batek.
Egitarauaren barruan, Anjel Lertxundi omenduko dute larunbatean, Otto Pette lanaren urteurrenaren harira. 12:30ean izango da ekitaldia, Zarauzko Musika Plazan. Pantxi Santamaria antzezleak performancea eskainiko du, eta brindisa egingo dute txakolinarekin.
Donostian izan zen aurtengo Literaturiaren aurkezpena, eta bertan izan zen Lertxundi. Otto Petteren inguruan hitz egitean, azaldu zuen irakurleek egiten dutela posible liburu batek irautea: "Egunero egiten ditu libururen batek 50 urte, baina jendea ez da gogoratzen".