Ez da koronabirus kasu positiborik izan eskualdean hirugarren egunez jarraian

Koronabirusari lotutako albiste pozgarriak lazgarriak baino gehiago dira azken aldian Urola Kostan. Hirugarren egunez jarraian ez da kasu positiborik detektatu eskualdean.

 

Koronabirusa kontrolpean dagoela dirudi Urola Kosta eskualdean. Eusko Jaurlaritzako Osasun Sailak emandako azken datuen arabera, ez da kasu positibo berririk detektatu eskualdean hirugarren egunez jarraian. Hala, datu ofizialen arabera, kontaketa hasi zutenetik eskualdeko 259 lagun kutsatu dira, baina azken egunetan ez du gora egin kopuruak. Hurrengoak dira kutsatuen kopuruak herriz herri: Zarautzen 142 lagun; Zumaian 48; Orion eta Azkoitian hamazortzina; Azpeitian hamasei; Getarian eta Zestoan bosna; Aian lau; eta hiru Aizarnazabalen. Datuak hauek dira, baina ezin da jakin zehazki eskualdeko zenbat herritar dauden, gaur egun, gaitzarekin. 

Beste egun batez sendatutakoen kopurua askoz handiagoa da zendutakoena baino. 24 orduko epean 498 sendagiri eman ziren Araban, Bizkaian eta Gipuzkoan; hildakoak, aldiz, 11 izan dira. Jaurlaritzako datuen arabera, 12.749 lagunek jaso dute alta. Hildakoak, berriz, 1.364 dira guztira. 

Lurraldekako datuak
Eusko Jaurlaritzak emandako azken datuen arabera, azken orduetan PCR proban positibo eman duten 43 kasu berri detektatu dituzte Araban, Bizkaian eta Gipuzkoan. Kontaketa hasi zenetik, orotara, 16.679 lagun izan dira kutsatuak.

Nafarroako Gobernuak ere argitaratu ditu datu eguneratuak, eta zenbaketa hasi zutenetik, guztira, 6.770 pertsona kutsatu direla, eta 476 zendu direla azaldu dute, bezperan baino bost gehiago.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!