Maskara derrigorrez erabili beharko da bihartik aurrera

Julene Frantzesena 2020ko uzt. 15a, 13:43

Gauerdian sartuko da maskararen erabilera derrigortzen duen neurria indarrean. Araban, Bizkaian eta Gipuzkoan maskara jantzi beharko da espazio publiko guztietan. Ostalaritza guneetan, gehienez, hamar lagunek eseri ahal izango dute mahai beraren bueltan.

Gaur gauerditik aurrera, pertsonen arteko distantzia mantenduta ere, maskara derrigor erabili beharko da Araban, Bizkaian eta Gipuzkoan. Eusko Jaurlaritzak azaldu duenez, koronabirusaren datuen bilakaerak behartu ditu neurriak hartzera, eta beraz, erabilera publikoko edozein espaziotan maskara jantzita izan beharko dute herritarrek.

Dena den, hondartzan edo igerilekuan maskara kendu ahal izango da, pertsonen arteko gutxieneko distantzia mantentzen bada edo pertsona horiek etxe berekoan baldin badira. Gainera, ostalaritza guneetan, tabernetan nahiz elkarteetan maskara kendu ahal izango da jateko edo edateko unean.

Gainera, maskararen erabilera ez ezik, mahai berean egon daitezkeen lagunen kopurua ere mugatzea erabaki du Eusko Jaurlaritzak, eta bihartik aurrera ezingo dute hamar lagunek baino gehiagok elkarrekin egon leku berean. Neurri hori terrazetan nahiz ostalaritza guneen barrualdean izango da indarrean, baita igerilekuetan eta hondartzetan ere.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!