Osasun Sailak jakinarazi ditu dagoeneko Araban, Bizkaian eta Gipuzkoan azken orduetan izan diren koronabirus datuak, baita herrikakoak ere. Hala, zehaztu dute COVID-19 kasu berri bat atzeman dutela Aian, azken zazpi egunetan antzeman duten lehenengoa, hain zuzen ere. Orion, berriz, ez dute kasurik atzeman azken astean.
Eskualdeko datuei dagokienez, gaur hemezortzi kasu berri atzeman dituzte, guztira –Azpeitian bederatzi, Zarautzen bost, eta Zumaian, Aian, Aizarnazabalen nahiz Azkoitian bana–. Hala, Azpeitia izan da eskualdean positibo gehien detektatu dituzten herria. Hain zuzen ere, Alde Zaharreko koronabirus agerraldiari lotutako beste bederatzi kasu atzeman ditu Osasun Sailak –joan zen ostegunetik 103 kasu, zehazki–.
510 Araban, Bizkaian eta Gipuzkoan
Araban, Bizkaian eta Gipuzkoan 510 kasu atzeman dituzte azken orduetan, atzo baino gehiago. Araban 86 kasu, Bizkaian 316 eta Gipuzkoan 81 zenbatu dituzte, eta etxebizitza hiru lurralde horietatik kanpo duten beste 27 lagunek ere eman dute positibo PCR proban. Atzo 90 lagun ospitaleratu zituzten hiru lurraldeetako ospitaleetan –guztira, 168 daude ospitaleratuta–, eta gaur egun hemeretzi pertsona daude ZIUn.