Eusko Jaurlaritzak eguneratu ditu egoera epidemiologikoaren gaineko datuak, eta horien arabera, Orion hiru positibo detektatu dituzte azken orduetan. Intzidentzia tasak 750,16 izaten jarraitzen du herrian.
Aian positibo bakarra atzeman zuten, Errezilen bezala. Bietan 500dik gorakoa da intzidentzia tasa, baina 5.000 biztanletik beherako herriak izanik, ostalaritza ixteko erabakia hartzeko garaian osasun eremuko egoerari ere kontuan izaten du Jaurlaritzak. Eta horretan badago alderik bataren eta bestearen artean. Aiaren osasun eremuan 500dik beherakoa da intzidentzia tasa; aldiz, Errezilenean gorakoa. Beraz, ikusteko dago Jaurlaritzak zer erabakitzen duen osteguneko berrikusketan.
Eskualdeko gainontzeko herriei dagokienez, positiboen emariak ez du etenik. Osasun Sailak kaleratu berrien dituen datuen arabera, atzo beste 34 kasu atzeman zituzten eskualdean, eta beste egun batez Azpeitia izan da herririk kolpatuena. Hamalau positibo atzeman zituzten han, eta gora egin du hamalau eguneko 100.000 biztanleko positibo metatuen kopuruak: 1.084,10 da egun. Eremu gorrian egonik, ostalaritza itxita eta taldean kirola egitea eta eskola kirola debekatuta dituzte joan den astetik, baina egoera “oso larria” dela iritzita, are neurri zorrotzagoak hartu ditu Azpeitiko Udalak, herriko hainbat eragilerekin hitz eginda. Horrela, gutxienez otsailaren 8ra itxita egongo dira udal instalazio guztiak eta bertan behera geldituko dira herrian antolatuta zeuden ekitaldi guztiak.
Zestoako egoera ez da askoz hobea. Atzo lau positibo baieztatu zituzten han, eta 1.001,54koa da intzidentzia tasa. Han ere eremu gorriko murrizketak indarrean dituzte joan den astetik, baina oraingoz ez dute balio izan egoerari buelta emateko.
Aizarnazabal eta Zumaia dira ostalaritza itxita eta taldeko kirola debekatuta dituzten eskualdeko beste bi udalerriak. Horietan, baina, poliki-poliki bada ere, egoera hoberantz doa. Zumaian lau positibo zenbatu zituzten atzo eta 661,44koa da intzidentzia tasa. Aizarnazabalen, aldiz, ez dute positiborik izan azken egunotan.
Egoera hobea dute Azkoitian eta Zarautzen. Azkoitian bost positibo baieztatu zituzten atzokoan, eta zertxobait jaitsi da hango intzidentzia tasa: 417,26koa zen atzo, eta 392,22koa da gaur. Zarautzen, berriz, bi positibo berrirekin, 222,73koa da tasa, eremu gorrian sartzeko 500eko langatik urrun.
Beizaman eta Getarian ez zuten positiborik atzeman atzo.
Hego Euskal Herrian mila positibotik gora
Eusko Jaurlaritzak eta Nafarroako Gobernuak emandako azken datuen arabera, beste 1.340 kasu positibo zenbatu zituzten atzo Hego Euskal Herrian. Zehazki, PCR probak eta antigeno testak aintzat harturik, 16.688 proba egin ziren Hegoaldean, eta %8 izan zen positiboen portzentajea. Bezperan, berriz, %8,7 izan zen.
Lurraldeka, Bizkaian 628 kasu detektatu dira; Gipuzkoan, 331; Nafarroan, 239; eta Araban, aldiz, 138 izan dira azken egunean.
Atzo 86 lagun ospitaleratu zituzten Araban, Bizkaian eta Gipuzkoan, eta gaur-gaurkoz koronabirusa duten 673 lagun daude hiru lurralde horietako erietxeetan; horietatik 125 Zainketa Intentsiboen Unitatean.