650 positibo berri hauteman dituzte Hego Euskal Herrian

Astebetean hirukoiztu egin da positibo kopurua; izan ere, aurreko larunbatean 243 positibo berri atzeman zituzten lau lurraldeetan egindako PCR eta antigeno probetan, eta atzo, 650 positibo zenbatu zituzten. Gipuzkoan, esaterako, 248 pertsonek eman zuten positibo atzokoan.

Gora egiten jarraitzen du COVID-19a atzemateko egiten diren probetan positibo eman duten herritarren kopuruak. Azken orduetan 650 positibo berri zenbatu dituzte, izan ere, Hego Euskal Herrian. Aste osoko datuak kontuan hartuta, erraz ikusten da goranzko joera hori: asteartean 366 positibo atzeman ziren, asteazkenean 458 eta ostegunean 519 positibo. Orain astebeteko datuekin alderatuta, are nabarmenagoa da joera, orduan 243 positibo berri zenbatu zituztelako.

Datuak lurraldeka ikusita, Eusko Jaurlaritzak eta Osasunbideak emandako datuen arabera, positiboetako 51 Araban atzeman zituzten atzo, Bizkaian 193, Gipuzkoan 248 (bezperan 170), Nafarroan 152, eta sei positibo, Hego Euskal Herritik kanpo bizi diren pertsonetan.

Araban, Bizkaian eta Gipuzkoan 8.417 test diagnostiko egin zituzten atzo, eta horietatik 498 izan ziren positibo; hau da, proba egin zutenen artean %5,9k eman zuten positibo. Dena den, positibotasun tasa jaitsi egin da zertxobait, bezperan %6,1ekoa zelako hiru lurralde horietan. Nafarroan, berriz, 1.444 test egin ziren, eta positibotasunak asko egin du gora, %7,3tik %10,5era arte egun bakarrean.

Ospitaleen egoerari dagokionez, COVID-19aren ondorioz zazpi pertsona ospitaleratu ziren atzo Osakidetzaren zentroetan, bezperan baino askoz gutxiago, orduan 26 ospitaleratu berri egon baitziren, eta ZIUn COVID-19a duten 33 pertsona daude gaur-gaurkoz. Bezperako kopuru bera da hori.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!