Eusko Jaurlaritzako Osasun Sailak argitaratu berri duen txostenaren arabera, atzo 55 lagunek eman zuten positibo Urola Kosta eskualdean koronabirusa hautemateko egindako PCR eta antigeno probetan. Gorrian dauden 5.000 biztanletik gorako zenbait herritan, Azkoitian eta Orion kasu, behera egiten hasi da intzidentzia tasa.
Beste egun batez, Zarautzen atzeman dituzte positibo gehien; izan ere, atzo han hamabost kasu zenbatu zituzten. Intzidentzia tasa, gaur-gaurkoz, 839,51koa da han, atzo baino zerbait altuagoa –835,23koa zen atzo–. Azkoitian eta Azpeitian 11na positibo baieztatu zituzten atzo egindako probetan. Azkoitiko intzidentzia tasak 1.118,25etik 1.043,14era egin du behera han. Azpeitiko intzidentzia tasak, berriz, gora egin du 749,01ko tasatik 762,16ra. Eskualdean intzidentzia tasa altuena duen herrian, Zumaian –1.190,60–, bederatzi positibo detektatu zituzten atzoko probetan. Hala eta guztiz ere, kasu metatuen tasaren adierazlea atzoko kopuruan mantendu da.
Orion eta Zestoan, bestalde, hiruna positibo hauteman zituen atzo Osasun Sailak. Orioko intzidentzia tasak behera egin du 962,17tik 945,86ra. Zestoan, berriz, 950,18etik 898,82ra jaitsi da tasa. Eskualdean zenbatutako beste kasu positiboak Getarian eta Aian zenbatu dituzte, bi positibo eta bat, hurrenez hurren. Aiako intzidentzia tasa 453,40koa da (atzo 403,02koa zen), eta Getariakoa 812,72koa. Aizarnazabalen, Beizaman eta Errezilen ez zuten atzo positiborik zenbatu.
2.000 positiboren bueltan
Atzo Hego Euskal Herrian egindako 14.312 probetan 1.980 lagunek eman zuten positibo. Positibotasun tasak altua izaten jarraitzen du: %13,8koa da Araban, Bizkaian eta Gipuzkoan eta %13,9koa Nafarroan. Atzemandako kasu positiboetatik 923 Bizkaian zenbatu zituzten, 464 Gipuzkoan, 404 Nafarroan, 157 Araban, eta 32 lurralde horietatik kanpo bizi direnen artean. Araba, Bizkai eta Gipuzkoako intzidentzia tasak gora egin du berriz ere, eta 870,30ean dago egun. Birsorkuntza tasak edo R0 indizeak, ordea, behera egin du beste behin, eta 0,99an kokatu da; Gipuzkoako batez bestekoa, berriz, 0,95ekoa da. Positibo batek kutsa ditzakeen lagun kopurua zehazten du adierazle horrek.
Osakidetzako eta Osasunbideako erietxeen egoeraren berri ere eman dute Osasun sailek. Araba, Bizkai eta Gipuzkoako erietxeetan COVID-19ak eragindako gaixotasunengatik atzo 43 lagun ospitaleratu zituzten, herenegun baino hogei gutxiago. Egun 233 pertsona daude ingresatuta Osakidetzaren mendeko erietxeetan, eta 60 lagun ZIUn. Nafarroan, bestalde, atzo hamalau pertsona ospitaleratu zituzten eta gaur-gaurkoz 120 dira erietxeetan dauden herritarrak. Zainketa berezia behar dutenak, ostera, hemeretzi dira.