Asteburuan positibo bat atzeman dute Aian, baina bat bera ere ez Orion

Atzoko datuen arabera, nabarmen jaitsi da positibotasun tasa: %1,7koa da Araba, Bizkai eta Gipuzkoan. 80 positibo baino gutxiago zenbatu zituzten denera Hego Euskal Herrian. 

Eusko Jaurlaritzak plazaratu berri duen txostenaren arabera, Orion ez dute koronabirus kasurik baieztatu asteburu osoan. Intzidentzia tasak, beraz, behera egin du herrian: 146,77an zegoen ostiralean, eta 130,46an dago une honetan. Dena den, horiz jarraitzen du Oriok. Aian kasu positibo bat zenbatu dute asteburuan, hain justu, ostiralean. 906,80tik 957,18ra igo da kasu metatuen tasa ostiraletik.

Eskualdeko herrietan hamasei koronabirus kasu atzeman dituzte denera azken hiru egunetan. Aurreko asteburuan 22 kasu atzeman zituzten, beraz, nabarmen egin du behera kasu berrien kopuruak. Positibo gehien Zarautzen atzeman dute: sei –bat ostiralean, bi larunbatean eta hiru atzo–. Apur bat igo da herri horretako intzidentzia tasa, 132,78tik 141,35era. Azpeitian bost positibo zenbatu dituzte asteburuan –lau ostiralean eta bat atzo–, eta intzidentzia tasak ostiraleko bera izaten jarraitzen du: 249,67. Azpeitikoa da eskualdeko intzidentzia tasarik altuena.

Zumaian, berriz, hiru kasu atzeman dituzte asteburuan –bat ostiralean eta bi atzo–, eta intzidentzia tasak bere horretan jarraitzen du: 111,94an. Zestoan kasu bat hauteman dute, ostiralean, hain zuzen.

Positibotasun tasa %2ren azpitik

Nabarmen jaitsi da Hego Euskal Herriko positibotasun tasa azken datuen arabera. Osasun Sailak eta Osasunbideak jakitera eman dutenez, 4.882 proba egin ziren atzo, eta horietatik 79k eman zuten positibo. Hori horrela, %1,7koa da positibotasun tasa Araban, Bizkaian eta Gipuzkoan, eta %1,3koa Nafarroan.

Ospitaleetako datuak ez dira horren onak, ordea. ZIUen okupazioak gora egin du larunbataz geroztik, eta gaur-gaurkoz, 52 dira COVID-19aren ondorioz zainketa bereziak behar dituzten pertsonak Araba, Bizkai eta Gipuzkoan. Ospitaleratuta daudenak, berriz, 124 dira denera. Nafarroan, 48 pertsona daude koronabirusak eragindako gaixotasunengatik ospitaleratuta, eta ZIUetan, berriz, hamabi.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!